លោកធាង ឡេង អភិបាល នៃគណៈអភិបាលស្រុកវាលវែង និងជាប្រធានគណៈបញ្ជាការឯកភាពស្រុកវាលវែង បានដឹកនាំកិច្ចប្រជុំគណៈបញ្ជាការឯកភាពស្រុក ប្រចាំខែកក្កដា ឆ្នាំ២០២៦

 

ស្រុកវាលវែងខេត្តពោធិ៍សាត់:ព្រឹកថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ លោក ធាង ឡេង អភិបាល នៃគណៈអភិបាលស្រុកវាលវែង និងជាប្រធានគណៈបញ្ជាការឯកភាពស្រុកវាលវែង បានដឹកនាំកិច្ចប្រជុំគណៈបញ្ជាការឯកភាពស្រុក ប្រចាំខែកក្កដា ឆ្នាំ២០២៦ នៅសាលប្រជុំសាលាស្រុកវាលវែង ដើម្បីពិនិត្យ និងវាយតម្លៃលទ្ធផលការងារដែលបានអនុវត្តកន្លងមក ព្រមទាំងពិភាក្សាលើបញ្ហាប្រឈមនានា និងដាក់ចេញនូវទិសដៅការងារបន្ត សំដៅពង្រឹងប្រសិទ្ធភាពការងារ ការរក្សាសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម និងការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព និងទាន់ពេលវេលា។

កិច្ចប្រជុំនេះ មានការអញ្ជើញចូលរួមពី លោកអភិបាលរងស្រុក លោកនាយករដ្ឋបាលស្តីទី លោកនាយករងរដ្ឋបាលសាលាស្រុក លោក លោកស្រីប្រធានការិយាល័យជំនាញជុំវិញស្រុក លោកមេបញ្ជាការកងកម្លាំងទាំងបីប្រភេទ អាជ្ញាធរភូមិ-ឃុំ នាយប៉ុស្តិ៍នគរបាលរដ្ឋបាល តំណាងមណ្ឌលសុខភាពទាំង៥ និងអ្នកពាក់ព័ន្ធក្នុងការអនុវត្តការងារនៅតាមមូលដ្ឋានស្រុកវាលវែង។

ក្នុងឱកាសនោះ លោកអភិបាលស្រុក បានលើកឡើងពីសារៈសំខាន់នៃការពង្រឹងកិច្ចសហការរវាងរដ្ឋបាលស្រុក កងកម្លាំងប្រដាប់អាវុធ មន្ទីរ-ការិយាល័យជំនាញ អាជ្ញាធរឃុំ-ភូមិ និងស្ថាប័នពាក់ព័ន្ធទាំងអស់ ដោយត្រូវបន្តអនុវត្តតួនាទី និងភារកិច្ចរៀងៗខ្លួន ប្រកបដោយការទទួលខុសត្រូវខ្ពស់ សាមគ្គីភាព និងការសហការគាំទ្រគ្នាទៅវិញទៅមក ដើម្បីធានាបាននូវប្រសិទ្ធភាពក្នុងការដោះស្រាយបញ្ហាប្រឈម និងតម្រូវការជាក់ស្តែងរបស់ប្រជាពលរដ្ឋនៅក្នុងមូលដ្ឋាន។

ជាមួយគ្នានេះ កិច្ចប្រជុំក៏បានពិភាក្សា និងតាមដានការអនុវត្តការងារសំខាន់ៗ ដូចជា ការថែរក្សាសន្តិសុខ សណ្ដាប់ធ្នាប់ និងសុវត្ថិភាពសង្គម ការបង្ការ និងទប់ស្កាត់បទល្មើសគ្រប់ប្រភេទ ការពង្រឹងការអនុវត្តគោលនយោបាយ «ភូមិ-ឃុំ មានសុវត្ថិភាព» ការគ្រប់គ្រង និងដោះស្រាយបញ្ហានានានៅមូលដ្ឋាន ការត្រៀមលក្ខណៈឆ្លើយតបចំពោះគ្រោះមហន្តរាយធម្មជាតិ ការថែរក្សាបរិស្ថាន និងអនាម័យ ព្រមទាំងការលើកកម្ពស់គុណភាពសេវាសាធារណៈ និងសេវាសុខាភិបាលជូនប្រជាពលរដ្ឋ។

លោក ធាង ឡេង បានណែនាំដល់អង្គប្រជុំ និងគ្រប់អង្គភាពពាក់ព័ន្ធ ត្រូវបន្តយកចិត្តទុកដាក់ខ្ពស់ក្នុងការចុះតាមដានស្ថានភាពជាក់ស្តែងនៅតាមមូលដ្ឋាន ស្តាប់ និងទទួលយកសំណើ សំណូមពរ និងកង្វល់របស់ប្រជាពលរដ្ឋ ដើម្បីស្វែងរកដំណោះស្រាយឱ្យបានទាន់ពេលវេលា ស្របតាមតួនាទី ភារកិច្ច និងនីតិវិធីជាធរមាន។ ទន្ទឹមនឹងនេះ ត្រូវបន្តពង្រឹងវិន័យការងារ ការទទួលខុសត្រូវ និងការផ្តល់សេវាប្រកបដោយតម្លាភាព សុចរិតភាព និងប្រសិទ្ធភាព។

កិច្ចប្រជុំបានប្រព្រឹត្តទៅក្នុងបរិយាកាសយកចិត្តទុកដាក់ និងកិច្ចសហការល្អ ដោយអង្គប្រជុំបានចូលរួមផ្តល់មតិយោបល់ ផ្លាស់ប្តូរបទពិសោធន៍ និងលើកឡើងពីបញ្ហាប្រឈមនានា ដើម្បីរួមគ្នាស្វែងរកដំណោះស្រាយ និងកំណត់ទិសដៅការងារបន្តឱ្យកាន់តែមានប្រសិទ្ធភាព សំដៅធានាបាននូវសន្តិសុខ សណ្ដាប់ធ្នាប់ សុវត្ថិភាពសង្គម និងការអភិវឌ្ឍប្រកបដោយចីរភាពនៅក្នុងមូលដ្ឋានស្រុកវាលវែង។

ជាកិច្ចបញ្ចប់ លោកអភិបាលស្រុក បានជំរុញឱ្យគ្រប់អង្គភាព និងអ្នកពាក់ព័ន្ធទាំងអស់ បន្តសហការគ្នាឱ្យបានជិតស្និទ្ធ អនុវត្តការងារតាមផែនការ និងទិសដៅដែលបានដាក់ចេញ ដោយផ្តោតសំខាន់លើផលប្រយោជន៍រួម និងការបម្រើប្រជាពលរដ្ឋ ដើម្បីរួមចំណែកកសាងស្រុកវាលវែងឱ្យកាន់តែមានសុខសន្តិភាព សុវត្ថិភាព របៀបរៀបរយ និងមានការអភិវឌ្ឍរីកចម្រើនជាបន្តបន្ទាប់។